Tusia Taunuuga Toatasi

O le Susuga ia Maris Sangiampongsa ua avea nei ma Amapasa o le Malo o Thailand i Samoa nei.

O Lana Afioga i le Ao Mamalu o le Malo o Samoa, Afioga Tui Atua Tupua Tamasese Efi na tauaaina iai e le Susuga i le Amapasa Tusi Taualoa o le aloaia o ia e avea ma Amapasa o lea Malo i Samoa.

O le Aso Tofi 15 Oketopa 2015, na faataunuu ai lea faamoemoe i le maota o Lana Afioga i le Ao Mamalu.

I lea toai taunuu ai o le Susuga i le Amapasa na muai pati ai le ava o le feiloaiga e pei ona masani ai Samoa i taimi o ana taligamalo.

I le malelega a Lana Afioga i le Ao Mamalu o le Malo, na ia saunoa ai i le galulue faapaaga o Malo e lua talu mai ona auai Thailand i le Fonotaga a Atunuu o le Pasefika, i le avea ai lea o Thailand ma Malo e faasoa lo latou foi tomai i itu e atinae ai atunuu o le Pasefika mo le lumanai manuia.

Na malele foi Lana Afioga i le Ao Mamalu o le Malo i le tulaga e pei ona faataua pea e Samoa le tulaga lea tau i suiga o le tau aemaise o le faatumauina o atinae tau i faigafaiva.

Na faailoa foi e Lana Afioga nisi o tulaga tau i galuega aemaise o polokalame faagasolo a le Malo o Thailand, lea o loo iai nisi o ana polokalame faagasolo o loo auai ai Samoa, ma o loo tele le sao o nei polokalame mo Samoa ma ona tagata.

Na faamauina ai foi le faafetai a Lana Afioga i le Ao Mamalu o le Malo, ona o ia polokalame faagasolo a le Malo o Thailand o loo ofoina mo Samoa.

“Talosia ia faatumauina ai pea le galulue vavalalata o Malo e lua, aua se manuia mo ona tagata i le lumanai.”

Peitai i le saunoaga a le Susuga i le Amapasa, na ia toe faapupula mai ai foi vaega e pei ona malele ai Lana Afioga i le Ao Mamalu o le Malo, i le tulaga tau i atinae mo le puipuia lea o le siosiomaga aemaise lava le tulaga lea i le suiga o le tau.

E tolu vaega na saunoa iai le Susuga i le Amapasa i le tulaga tau i faigapaaga i le va lea o le Malo o Thailand ma le Malo o Samoa, o le va ma Pisinisi aemaise o le fesootaiga lea ma tagata.

I le tausaga e na sei mavae atu 2014, lea na saunoa le Susuga i le Amapasa na valaaulia mai ai e le Malo o Thailand nisi o tagata faipisinisi i Samoa ina ia malaga asiasi atu i lona atunuu.

Mo le faaauauina o le galulue faatasi aemaise o le faatinoina o atinae mo le manuia o Malo e lua, na saunoa manino ai le Susuga i le Amapasa o le a galue ma tautua ina ia faaauau pea lea faigapaaga, ina ia le gata o le manuia o ona tagata, ae faapea foi le manuia o tagata Samoa.

O le Afioga i le Amapasa na faauumai le Iunivesite i Ohio i le faailoga o le Master i le Faatufugaga i le tulaga o Faigapaaga Faavaomalo (Master of Arts in International Relations).

Na amata ona tautua lea tamalii mo lona Malo i le tausaga e 1986 i le Matagaluega o le Va-i-fafo a Thailand.

I le amata mai ai o lana tautua e pei ona faaalia i se Pepa o Faamatalaga, e tele nisi o tofiga na tofia iai lea tamalii i totonu lava o le Matagaluega o le Va-i-Fafo a lea Malo.

O le tausaga e 2009 na tofia ai o ia e avea ma Amapasa o le Malo o Thailand i Nepal, mulimuli ane ai tofia e avea ma Amepasa o lea lava Malo i le Malo o Ausetalia i le tausaga e 2001 seia oo mai lava i le taimi nei.

O le maea ai ona feiloai atu le Afioga i le Amapasa i Lana Afioga i le Ao Mamalu o le Malo, na agai atu ai loa e feiloai i nisi o Sui o le Malo aemaise o sui o le Kapeneta ma o Pisinisi Tumaoti.

Share This

About the author