Tusia Fuialo Ulafala Seupule

O le tumutumu ai o le malae i Malaefatu i Sogi i le faaaliga a le Matagaluega o Faatoaga na faamanatu ai ma le 70 tausaga o le faalapotopotoga o le FAO.

I le sauniga i lea taeao na saunoa ai le Afioga i le Minisita o Faatoaga Le Mamea Ropati i le tulaga ese o le faaaliga a le Matagaluega i lenei tausaga ina ua faamanatu faatasi ai ma le aso fanau o le FAO.

Na taua e Le Mamea e faapea, o le faamoemoe maualuga lea ua tulaga ese ai le faaaliga o fua o faaeleeleaga i lenei tausaga ona o lea ua faamanatu ma le 70 tausaga o le FAO.

O le Faalapotopotoga o le FAO sa faatuina i le tausaga e 1945  i le faamoemoe laualuga ina ia unaia tulaga o le lava o taumafa i le lalolagi.

O le sini autu lea o lenei Faalapotopotoga ma o le tele foi o polokalame ma atinae i lenei tafa o le lalolagi o loo faatupeina e le FAO.

Na saunoa Le Mamea e faapea, i Samoa lava ia o loo mafana lelei le mafutaga ma le FAO ma o le ala foi lea o le tele o polokalame o loo lagolago malosi mai ai le FAO mo Samoa.

I le sauniga la i lea taeao i le malae i Malefatu, na faafetaia ai e Le Mamea le sao o lenei Faalapotopotoga mo Samoa i le unaia o tulaga tau i Faatoaga aemaiase o le itu ia lava taumafa mo tagata i aso fai pea.

Sa saunia e le Ofisa o le FAO i Samoa nei se keke e faailogaiona ai le atoaga o le 70 tausaga o lea Faalapotopotoga ma o le Afioga lava i le Minisita na ia uluai alaina lea keke.

Sa faamanuia ai foi e Minisita o le Kapeneta faatasi ma le Au Valaaulia ma i latou uma na i ai i lea taeao e ala i le usuina o le pese o le aso fanau.

Share This

About the author