Tusia Fuialo Ulafala Seupule

O le tulai mai o le tulaga lelei ua i ai le maketi o le talo i Samoa mo le auina atu i fafo o se faiafiaga tele lea i le au fai faatoaga.

E pei ona silafia o le talo numera 1 ma 2 o talo ia o loo auina atu i konetaina mo Niusila faapea ai ma le talo vela o loo auina atu i Ausetalia.

O le tapena ai o le Matagaluega mo le faaaliga i lenei tausaga ua faalauiloa mai ai le faalia faatasi ai ma nisi o talo fou e 3.

O nei talo e pei ona faalauiloa mai e le Afioga Misa Konelio e faapea, ina ua aafia Samoa i le faama’i o le lega o le taimi lava lea sa le mapu ai le saga saili ma sailiili i auala eseese ina ia maua ai ni talo e toe lalagaina le tamaoaiga tau maumaga i le atunuu.

“O se komiti o loo galulue faatasi ai le Matagaluega ma nisi o Faalapotopotoga Tumaoti ale Malo faapea ai ma le Iunivesete o le Pasefika i Saute sa faatinoina lea galuega.

“O talo e 3 e pei ona ua faalauiloa nei o se taumafaiga lava ina ia toe maua mai le tatou talo niue lea sa i ai ae le’i faaleagaina e le lega.

“E pei ona silafia o le tatou talo niue sa iloga ona malosi ai Fiti ma ua tamaoaiga ai Fiti i le tele o tausaga.
“O talo la nei e 3 e pei ona ua faasafua atu i fai faatoaga lea na galulue faatasi ma i latou na taumafaia nei fuafuaga ina ia tōtōina ma toe lipoti mai pe a seleseleina.”

Na faailoa e Misa e faapea, o talo nei e 3 ua maua i suesuega e lalata tele lona manogi ma lona tofo i le tofo o le talo niue pe a fua i faafeusuaiga ma aula na faia ai.

O nei talo e tolu ua faaigoaina nei i le Lani, Tanu, faapea ai ma Fusi, faailoa e Misa le pogai o igoa o nei talo ona o talo ua faatino ai nei fuafuaga ma tuuina atu i faifaatoaga mai afioga o Fusi Safata, o Tanumalala faapea ai ma Salani Falealili lea ua faaigoaina i le Lani.

O le naunautaiga o le Matagaluega e pei ona faamatalaina e Misa, afai e taunuu talo nei e 3 i se taunuuga lelei, ua mautinoa loa le faaopopo atu o nei talo i le numera 1 ma le numera 2 o loo i ai nei mo le auina atu i maketi i fafo.

Share This

About the author