Tatala se poloketi fou eletise e maua mai le la ‹ Savali News

Home » Samoan » Tatala se poloketi fou eletise e maua mai le la

Tatala se poloketi fou eletise e maua mai le la

Tags:      Posted date:  October 17, 2015  |  No comment

Tusia Fuialo Ulafala Seupule

O se vaaiga fou i le itu i sasae o le malae vaalele faavaomalo i Faleolo i le taatitia ai o mea faitino e pue ai le vevela o le la mo le gaosiga o le eletise.

O le Aso Faraile o le vaiaso talu ai Aso 16 Oketopa 2015 na tatala aloaia ai lea poloketi i lona nofoaga i Satapuala.

O le Afioga i le Alii Palemia Tuilaepa Sailele Malielegaoi na Saunoa i le Saunoaga Autu o lea faamoemoe.

Na faailoa e Tuilaepa e faapea, o le poloketi lenei na manumalo ai se alii mai Niusila o Jamie Harrison ma lana Kamupani o le Sun Pacific e tusa o tauofoga sa faia.

Na faamanino foi e Tuilaepa le tulaga o le naunautaiga o le Malo e unaia lenei atinae ona ia maua ai se faamama avega i le atunuu mo le tau o le eletise.

O se tasi itu o se fuafuaga a le Malo ina oo atu i le tauasaga e 2017 ua le toe faaaogaina le eletise lea e faaaogaina ai le suauu.

O le faamoemoe laualuga o le Malo ua le gata i le faaauau pea ona siitia o le tau o le suauu mai lea taimi i lea taimi ao le itu tāua o le puipuia mai ai o le siosiomaga ma le aafiaga o asu mai suauu.

O le poloketi lenei na faamatalaina e faapea e tusa ma le 11% le eletise faaopopo o loo maua mai ai lea e tusa ma le 2.36 meka uati.

I lea aofaiga o le eletise o loo maua mai i le la i le poloketi lenei ua faamauina e faapea, e mafai ona ola ai ni aiga 2,500.

Sa faamtalaina foi e Tuilaepa nisi o faamanuiaga o nei ituaiga o atinae, ua le gata i vaega e pei ona taua i luga ao le isi itu taua o le maua ai o galuega a tagata o nuu o loo tu lalata atu i nei atinae.

Saunoa Tuilaepa, ua i ai le faamoemoe o le Malo mo le motu o Savaii i le Eletise Faafouina ma ua amatalia foi ona faagasolo lea galuega i ona laasaga ua masani ai ituaiga o galuega tetele faapenei e pei foi ona faia i nei atinae.

O le Afioga i le Minisita o Galuega Tetele ma Atinae a le Malo o ia foi o le Minisita o le Malosiaga Faa eletise Manualesagalala Enokati na ootiina le lipine e tatala aloaia ai lenei atinae, ma sa auai nisi o Minisita o le Kapeneta, Faipule ma Faauluuluga o nisi o Matagaluega a le Malo.


About the author