Tusia Taunuuga Toatasi

E $31 miliona le seleni ua foai mai e le Faletupe o le Lalolagi i le Malo o Samoa.

O lea foai ua faamaonia e le Komiti Faatonu a le Faletupe o le Lalolagi, e fesoasoani i le toa 45,000 o aiga Samoa o loo alala ma papaaao i nofoaga e aafia gofie i suiga o le tau.

I le faalauiloa ai o le foai, o le Susuga Franz Drees-Gross o le Faatonu a le Faletupe o le Lalolagi i le Pasefika, na ia saunoa ai i le naunau o le Faletupe e fesoasoani ia Samoa.

Na taua e lea Faatonu o le Faletupe o le Lalolagi, e aafia gofie aiga o loo nonofo e tulalata i matafaga aemaise o aiga o loo nonofo i vaega maualalo o le atunuu i suiga o le tau.

Na faaalia e le Faatonu le faamalieina o le Faletupe o le Lalolagi, e ala i le CIF (Climate Investment Funds), e fesoasoani i le Malo o Samoa, ina ia matinoa le saogalemu o le lumanai o i latou o loo nonofo iia vaega o le atunuu.

Ua tuuina lea seleni i lalo o le poloketi aua le faatautaiga galuega fesoasoani mo aiga o loo patino i ai lea alagatupe.

Ua i ai le faamoemoe e pei ona taua e le Faatonu e tatau ona amata faagasolo le poloketi, ina ia puipuia mai ai ola ma soifua o i latou o loo nonofo i lea vaega o le atunuu.

E le gata i lea a o le puipuiga o le siosiomaga aemaise o le siitia atili o aoaoga faalauiloa o suiga o le tau, aua le nofo silafia o le mamalu o le atunuu.

O lea poloketi o le a fesoasoani tele aua le faamalosia o vaega o le atunuu o loo ave i ai le faamuamua o lea fesoasoani, ina ia vave lona faataunuuina.

O le a galuega o le a galulue faatasi ai nisi o faalapotopotoga aemaise o taitai o le atunuu, ina ia siitia le auaunaga faalauiloa aemaise o le tautua aua le nofo malamalama o tagata.

E le gata i lea a o le fefaasoaa’i o agavaa o tagata i le maitauina o vaega o le tau, ina ia maua pea le malamalama ma le iloa i soo se vaega e ao ona silafia.

E fa atumotu o Samoa o loo nofoia e le mamalu o le atunuu ae lima atumotu tuufua, ma le faitau aofai o ona tagata e oo atu i le 195,000.

Share This

About the author

Palemia Ugapo