Amapasa o lea Malo, Susuga Kazumasa Shibuta, ma le Minisita o Tupe, Afioga Faumuina Tiatia Liuga, i le vaitaimi o aso fiafia.

Tusia Taunuuga Toatasi

O le Malo o Iapani lea o le a aumaia taavale e fesoasoani ia Samoa, aua lana taligamalo i le Fonotaga a Atunuu Laiti Tauatia’e lea e talimalo ai Samo ai le masina o Setema.

E $2.4 miliona o le a faatupeina ai e le Malo o Iapani taavale e pei ona saini feagaiga ai le Amapasa o lea Malo, Susuga Kazumasa Shibuta, ma le Minisita o Tupe, Afioga Faumuina Tiatia Liuga, i le vaitaimi o aso fiafia.

O le fesoasoani e aofia ai taavale o le ituaiga o le va e 16 nofoa ma pasi e 32 nofoa e 14.

O lea fesoasoani o le a faatupeina ai foi ma vaega moomia o taavale (spare parts).

I le taliaina o lea fesoasoani na saunoa ai le Afioga i le Minisita o Tupe i le taua ma le aoga o nei taavale, e le gata o le fonotaga o le a talimalo ai Samoa, a e faapea foi i nisi fonotaga o le a talimalo ai Samoa i le lumanai.

E silia ma le 3,000 sui usufono mai le silia ma le 190 atunuu o le a malaga mai i Samoa e auai i le fonotaga a le SIDS.

O le maea ai o le Fonotaga lea a le Malo Aufaatasi, ona sosoo ai lea ma le Fono Lona 11 a le Western and Central Pacific Fisheries Commission, e talimalo ai foi Samoa i le masina o Tesema.

O loo i ai le faamoemoe e oo atu i le 500 le aofai o i latou o le a malaga mai mo lea fonotaga.

O le sainigalima foi lea na faailoa ai e Faumuina se tasi foi o Fonotaga e talimalo ai Samoa i le masina o Novema lea e taua o le Asia-Pacific Public and Private Sector Partnership.

E silia foi ma le 500 sui usufono o lea fonotaga o loo i ai le faamoemoe e malaga mai i Samoa.

Share This

About the author

Palemia Ugapo