Faatonu Aoao o le FAO i Roma, le Afioga a Tagaloaletoamalaeoletoto Jose da Silva, Taitai o le Sauniga Utufua Naseri ma le Afioga i le Minisita Le Mamea Ropati

 

Tusia Nanai. T. Laveitiga Tuiletufuga

O le pau o tupe maua a le malo mai fefa’atauaiga o fua o fa’aeleleag i atunu’u i fafo ile 10% ole faitau aofa’i o tupe maua a Samoa mai oloa olo’o fa’atauina i atunu’u i fafo, ose tasi lea o lu’itau olo o feagai ma le Matagaluega o Fa’atoaga ma

Faigafaiva ina ia toe si’itia i le 50% e pei ona iai famaumauga ile tausaga e 1978.

O le fofo a le Matagaluega o le fa’atinoina lea o  atina’e fou e pei ona fa’alauiloa fa’alauaitele e le ali’i Palemia Tuilaepa Lupesoliai Sailele Malielegaoi i le tatalaina aloaia ole Fa’aliga a Faifa’atoaga o lenei tausaga.

Saunoa le ta’ita’i o le malo, ua iai nei fuafuaga ina ia si’itia ai pea le aofa’i o pusa talo e fa’atau atu i Niu Sila ma le malo o Amerika.

I le taimi nei o lo’o galulue so’oso’o tauau ai le Matagaluega o Fa’atoaga ma le au faipisinisi ina ia toe maua mai a tatou maketi i Niu Sila, Ausetalia ma Amerika  lea ua pulea e faifa’atoaga a Fiti le sapalai o le maketi.

Fa’alia ele ali’i Palemia, o lo’o fa’agasolo nei tapenaga mo le gaosia o le fale fa’apitoa e tapena ma fao-pusa (container) ai talo ma isi fa’aeleeleaga a le au faifa’atoaga i luga o le uafu i Apia, ina ia faigofie ai ona fa’ae’e Container i va’a-oloa, mo le auina atu i atunu’u mamao.

O i fo’i o le a ilo  lelei ai talo ina ia mautinoa e na o talo aupito lelei e ave i fafo, ina ia tauleleia ai la latou talo ma atili mana’omia ai e tagata.

O le a fausia fo’i le isi nofoaga teu-oloa fa’apea i Aukilani i Niu sila e taunu’u atu i ai pusa oloa o fa’aeleeleaga a Samoa ma fa’atau atu i o tatou tagata.

FAIGAFAIVA

O lea ua amata fausia nofoaga e fa’afofoa ai figota ma tama’i i’a, i Toloa i Faleolo, i le itu i gatai o le malae va’alele mo le tufaina atu o tama’i i’a ma figota i nu’u ma alalafaga i tua e toe fa’atamaoaiga ai le aloalo ma fagotaga.

 

OFISA I NUU MA AFIOGA

Ua amata nei ona se’e atu i alalafaga i tua le Polokalame fuala’au fai-sua, lea na tatala aloaia ai Fale fou a le Matagaluega lea ua fausia nei i Poutasi ma Savaia i Lefaga, fa’apea Sala’ilua Asau ma Saina i Savai’i. O nei nofoaga fou, o le a fa’amili ai la’au laiti faisua ina ia mauagofie tamai-la’au, ma fa’ata’ita’i ai Fale la’au uumi (Tunnel house), ina ia silafia ai e le atunu’u lo latou fa’aaogaina ma le aoga.

Mo le silafia e le mamalu ole aufaifa’atoaga, o lea ua fa’aaoga telefoni feavea’i  e vili sa’o ai le faifa’atoaga po’o le faifaiva i le Ofisa i Apia pe a fia maua se feasoasoani, ae totogi e le tatou Matagaluega le talanoaga. E talitonu le Matagaluega, e vave atu le auala lea tatou te feso’ota’i ai. Aua ua tofu toeina ma lo’omatua ma le telefoni feavea’i i nei aso, ua o’o lava i le alu i le maumaga o ave ai le telefoni

LAFU MANU

O le a toe auami le uta o manu papalagi ma momoe mai Ausetalia ma Fiti i le tausaga 2014, e feusua’i ma tatou lafu manu Samoa, ona tufa atu lea ile mamalu ole aufaifa’atoaga o tama’i povi ma tama’i mamoe lelei mo atina’e  i nu’u i tua. O le fausia fo’i o le fale fasimanu fou i le nofoaga ua uma ona fa’ailoga i Nu’u, ina ia mama ai a’ano o manufasi mo le fofoga-taumafa, ma maua e tagata uma le soifua maloloina lelei.

O le a toe lalaga le atina’e o mea i tuaolo ma moa mo le fofoga taumafa ma fa’aitiitia ai manufasi tu’uaisa o lo’o faatau mai fafo. E fa’atupe lea atina’e e se nonoga-tupe fa’apitoa o le a o’o iai se fa’amatalaga i se taimi mulimuli ane.

NIU,KOKO & KOFE

Toe fa’auau le polokalame lavea’i (Stimulus Package) mo le toe totoina o le niu ae tova i koko, kofe, Tipolo ma isi fugalau’aina. Avea fo’i lenei avanoa e toe fa’amanatu atu ai i le mamalu o le aufaifaatoaga e le’o auai i lenei polokalame, e susu mai ma talaa’ao mai e lesitala lou suafa i le tatou polokalame lea e fa’aaoga tatau ai ia fesoasoani ua ofo atu e le Matagaluega ma le malo.

O le a toe fausia le nofoaga fou i le Esetete Tausi i Olomanu, e fai ai suesuega ma fa’amili ai niu’eseese mo le toe totoina ai niu i samoa e sui a’i le anoano o toganiu ua paoga ma ua fa’asolo ina fua-ninii ma mamate.

Ma ua fautuaina ai ele alii Palemia le mamalu ole aufaifa’atoaga, sei alolofa e taumafai mai le toe totoina o la tatou niu.

Share This

About the author