Tusia Mamea Ulafala   

O le vaiaso nei na tatala aloaia ai nisi o nofoaga i Upolu nei faapea foi ma Savaii ua fausia faapitoa mo le au fai faatoaga i nuu i tua.

O le Minisita o le Matagaluega o Faatoaga ma Faigafaiva na tatalo aloaia nei nofoaga.

I le Saunoaga a Le Mamea Tuiletufuga Ropati Mualia i le tatalaina o le nofoaga i Poutasi, na ia faafetaia ai le Malo o Saina ua tino ai lenei faamoemoe ua le gata i le fausia o fale ae ua faapea foi i tomai e ala i le faamiliga ma le totoina o laau aina.

“O le taumafai o le Malo ina ia tuliloa nisi o ana Vaaiga Taulai e ala i le manuia faasopolia o tagata uma i soo se atinae, o le faamoemoe maualuga lea o nei atinae.

“O le uiga o lea mea, o lea ua mafai e le tatou Matagaluega e ala i le fesoasoani mai a nai o tatou uso mai Saina ona faasafua mai i tua nei laau toto ma ua mafai foi ona faafailele i le fale e pei ona tatou silasila atu i ai. “E le toe tau malaga atu la i le tatou Ofisa i Nuu ae o le a mafai lava ona agai i Ofisa e pei ona ua faatutuina i nuu i tua i Upolu nei faapea foi ma Savaii. Saunoa i ai Le Mamea.

Na faaalia e Misa Konelio o loo faauluulu i ai le Ofisa o Laau Toto i Nuu e faapea, o le vaega lua lenei o lenei polokalame.

E lua nuu ua faapea ona faatino ai lenei faamomoe mo Upolu nei lea e aofia ai Poutasi ma Savaia ae tolu mo Savaii e aofia ai Salailua Asau ma Sasina.

Saunoa Misa o loo i ai le faamoemoe o le Matagaluega e faaopopo nisi  fale faapenei ina ia mautinoa le faafaigofie e le mamalu o le atunuu o lenei auaunaga.

O nei fale laau faatasi ma Ofisa ua fausia faapitoa mo i latou o le a nofo mau ai i nei nofoaga mo le tuuina atu o le auaunaga i le au fai faatoaga i lea Itumalo ma lea Itumalo.

O fale laau nei ua maua ai foi ma koko faapea ai ma niu toto aemaise o soo se laau aina.

Share This

About the author

tama o le mau