Tuumalo le toe tagata o le Fono Faavae ‹ Savali News

Home » Samoan » Tuumalo le toe tagata o le Fono Faavae

Tuumalo le toe tagata o le Fono Faavae

Tags:      Posted date:  September 27, 2015  |  No comment



Tusia Fuialo Ulafala Seupule

O le Aso 07 o Setema 2015 na pa mai ai le tala faavauvau i le tuumalo ai o le Afioga Aeau Seumanutafa Aiolupotea Tonumaipea Taulupoo Lafaialii.

O le Afioga Aeau o se tamaalii sa iloga i lona soifua galue mo Samoa aemaise pe a tilotilo i lona tala faasolopito.

I le talaaga o lona soifua na māua ai sa aoaoina o ia i le Aoga a Felela i Mulivai ma faasolo atu ai i le Kolisi a Sagato Iosefo. Sa galue o ia i le Matagaluega o Faatoaga o se fai totogi mulimuli ane ua avea o ia ma Ofisa na te pasiaina le vela o le popo ma le koko mo le auina atu i fafo.

I le tala faasolopito o le Fono Faavae a Samoa na iloa ai o ia o le toe tagata o lea fono.

Sa avea foi o ia ma Faipule o le Palemene mai le itumalo o Falealupo ma sa ia tauaveina foi le tofiga o le Sui Fofoga Fetalai o le Maota i na taimi.


Sa tofia foi Aeau ma Sui o le Komiti Faapalemene i itu tau Suetusi aemaise o le Komiti mo Tulafono Taufaaofi.

Na avea foi o ia ma se tasi o Faamasino o le Faamasinoga o Fanua ma Suafa mulimuli ane avea ma se tasi o Sui Sina o le Komiti o le Faleula o Samoa.

O ia o se tasi o loo ia tauaveina se faaaloalo maualuga a le Malo o Samoa e ala i le Pine Taualoa sa tuuina atu e aloaia ai lana tautua ia fatia ua sola.

Sa filifilia le Afioga Aeau Seumanutafa Aiolupotea Tonumaipea Taulupoo Lafaialii, e Taitaifono Soofaatasi ma le Komiti o Tapenaga o le faamanatu o le 50 tausaga talu ona Tutoatasi Samoa, na te sisiina le tagavai i le sauniga faapitoa o le tutoatasi iā Iuni 2012 i le male i Tiafau.

E i ai foi ona tofiga i le Ekalesia e pei o le Aoao Fesoasoani i le EFKS i Falealupo Uta sa avea foi ma Komiti o Aoga faapea ai ma le Komiti o Tupe a le Ekalesia i se taimi umi.

Sa faaipoipo atu o ia iā Lupeautino Taimalieutu Meapelo Tamasese o Nofoalii ma e toa 4 o laua alo.

I le itu tau taaloga na molimauina ai o se tasi o sui tuai o le au malosi a Vaiala lea na siamupini i le tausaga e 1962.

I molimau o lona toe sauniga na malele ai le Ao Mamalu o le Malo Afioga Tui Ᾱtua Tupua Tamasese, ma sa iloga ona lologo le aofia i tala iloga o Aeau ma nisi o matatia na ia ausia e pei ona malele i ai le Ao Mamalu o le tatou Malo.

Na faaiu toe sauniga o le Afioga Aeau Taulupoo i lona oliolisaga tumau i lona aiga i Falealupo Uta.


About the author