Tusia Taunuuga Toatasi

O Lana Afioga i le Ao Mamalu o le Malo, Afioga Tui Atua Tupua Tamasese Efi, na tauaaoina Tusi Taualoa a le Susuga i le Amapasa fou o Tagatanuu o Farani i Samoa, Susuga Laurent Contini.

O le taeao o le Aso Tofi 3 Aperila 2014, i le maota o Lana Afioga i le Ao Mamalu o le Malo, na faatautaia ai lea feiloaiga.

Na muai faafeiloai le Susuga i le Amapasa i le ava e pei ona masani ai le atunuu i ana taligamalo.

I le saunoaga faafeiloai a Lana Afioga i le Ao Mamalu o le Malo, na ia faamauina ai le agaga faafetai ona o nisi o fesoasoani a le Malo o Farani mo le atinae o Samoa.

Na saunoa Lana Afioga i le Ao Mamalu i le loa silafia uma e atunuu o le Pasefika o lea atunuu, ona o ana teritori e aofia ai Niu Kaletonia, French Polynesia aemaise o Wallis ma Futuna, e pei ona tuaoi ma Samoa.

I le faavaeina o feagaiga faavaomalo i le tausaga e 1974, e pei ona silafia le galulue soosootauau o Malo e lua.

O nisi o vaega na faamauina i le saunoa a Lana Afioga i le Ao Mamalu o le Malo, o le tausaga e 2009 e pei ona puapuagatia ai le atunuu i faalavelave faalenatura o le tsunami, na galulue faatasi ai Farani, Niu Sila ma Ausetalia i lalo o le “FRANZ�? aua le tuuina mai o fesoasoani mo tagata o le atunuu.

E le gata i lea a o vaega tau mo le soifua maloloina o le atunuu i lena vaitau na auina uma mai i lea fesoasoani.

E le gata i lea, a o i latou e toa 24 (French seamen) o loo faamautu i Niu Kaletonia, lea na fesoasoani i le toe fausia o nisi o faleaoga aemaise o maota gasegase i totonu o le atunuu.

E pei ona faaalia i le malelega a Lana Afioga i le Ao Mamalu o le Malo, o fesoasoani a Farani o loo agai i le Iuni a Europa, lea o loo fesoasoani mai ai le atinae o nisi o vaega o le atunuu e aofia le galulue faapaaga mo le faaleleia o le suavai, o vaega tau i le vaaitau, o vaega tau i le gataifale, ma nisi lava o fesoasoani, aua le atinae o le atunuu.

Ua malele ai foi Lana Afioga i le Ao Mamalu, i le faaauauina lea ona galulue faapaaga pea Malo e lua, aua se manuia mo ona tagata.

I lalo o le faamalu a Malo Aufaatasi, ua malele ai Lana Afioga i le Ao Mamalu, o le a faapaaga pea Samoa ma Farani aua le faalauiloaina o nisi o faafitauli aemaise o nisi o vaega e ao ona faailoa, ina ia maua ai fesoasoani aemaise o le foia o ni faafitauli e feagai ma atunuu e lua.

O le Susuga ia Laurent Contini o se tasi ua leva ona tautua i le Ofisa o le Va-i-fafo a le Malo o Farani.

I le tausaga e 1985 na tofia ai o ia e avea ma Konesula o le Amapansa o Farani i New Dehli, ma na tofia foi i nisi o tofiga maualuluga o le Malo e nisi o tausaga mulimuli ane.

E oo mai i le tausaga lenei i le tofia ai e avea ma Amapasa o Farani i Samoa, o loo avea foi ma Amapasa o Farani mo Niu Sila.

I le malaga mai ai o le Amapasa i totonu o le atunuu, o loo faatasi mai ai lona faletua faatasi ai ma se tasi o ona alo tamaitai.

Share This

About the author