E $7 miliona tupe Niusila na fusia ai le galuega o lenei malumalu tele a le Ekalesia Metotisi i lona laumua i Mulivai o Aele i Faleula.

Na saunoa le Failautusi Aoao o le Ekalesia le Susuga Vaiao Alailima Eteuati na amata le galuega i le tinoitupe e $4 miliona tala Niusila.

“E lei tuai le galuega ose faafitauli tau tupe na tuai ona o mea uma o lo o fausia ai le malumalu e aumai mai uma i Niu Sila, e i ai taimi e faaletonu ai Malaga a vaa o le ala lea o le faatuai o le galuega” O Vaiao lea. 

Sa saunoa foi Vaiao e tusa o le tolu tausaga na faatinoina ai le galuega i lalo o le taitaiga a le Agaiotupu le Afioga Lemalu Saeni Lemalu ma le Falefa o le Latou Aiga Salemalama e fa sefulu.

O le fale logo i le pito i luma o le malumalu na faatupeina e le mafutaga a le Au Uso Fealofani a le Ekalesia.

O le tele foi o vaega o lenei galuega na tuuofo mai, e le gata i faifeau ae faapea foi i Sinoti ma tama fanau a le Ekalesia.

O le pa atoa o lo o siomia ai le fale faapea ai ma le teuina atoa o le lotoa na feagai lea ma le Konekarate a le Afioga Laupaoo Tanielu o se tasi o tama fanau a le Ekalesia, o ia foi o se sui o le Komiti Tumau.

O le tupe na maua i taalolo i lea taeao e tusa ma le $112,000 e ese ai ma le meaalofa a le Ekalesia Faapotopotoga  i Samoa e $5,000.

O le Afioga i le Peresetene o le Ekalesia Susuga Tupu Folasa II na ia ta’itai’a le sauniga o le faapaiaina o lenei galuega tele.

Na auai i lea aso le Afioga i le Ao Mamalu o le Malo le Afioga Tui Atua Tupua Tamasese Efi ma le Masiofo faapea ai ma le Afioga i le Alii Palemia ma le Kapeneta, Minisita Lagolago faapea ai ma Sui o Ekalesia i Samoa.

O le Fetalaiga Tolofuaivalelei Falemoe Leiataua na ia faaleoina le agaga faafetai i le Ekalesia e tusa o faaaloaloga maualuga ma le faatamalii na faasopolia uma ai le valaulia, e le gata i le Malo a’o Sui o Ekalesia eseese na auai.

Share This

• 
• 
• 
• 
• 
• 
• 
• 
• 
• 
• 

About the author