Tusia Fuialo Ulafala

Ua lipotia mai nei nisi o tala mai le Pasefika a le Leitiō a Niusila le oo atu o tagata maliliu i le 29 le aofai ona o le afā o Winston.

O le motu o Koro lea ua faalia mai na matuā iloga ona maua i le mata o le afā ma faapea ai ona nutipalaina mea uma.

Na faalia mai ai ua faamauina i le 29 o i latou ua maliliu i le taimi nei ma ua mautinoa foi le faaopopo o lenei aofaiga.

O loo i ai pea nisi o tagata o loo tau saili faatasi ai ma i latou o loo manunua tigaina ona o manuaga i le taimi o le afā.

Na faailoa i le lipoti lenei a le leitiō a Niusila le matuā ogaoga o aafiaga o le motu o Koro ona e faapea mai o le motu o Koro na maua lelei i le mata o le afā ma o le vaega lona 5 na oo i ai le malosi o le afā o Winston.

Na faaalia e le sooupu  a le Malo o Fiti o Edward i se lipoti e faapea, e mautinoa e i ai nisi o maliu faaopopo i lenei faalavelave.

Ua le gata i lea ae na ia faailoa foi, o le itu faigata lava i le taimi nei o le faigata o auala o fesootaiga ma le felauaiga o mea manaomia.

Sa ia faailoa foi e faapea, ua leva ona tapena Fiti mo le afā ao le itu ua pogai ai le mafatia o nisi e pei o i latou i le motu o Koro ona o i latou tonu ia na faasaga i ai le mata o le afā.

Ua faailoa mai foi o le tele o i latou na nonofo i Koro ua leai ni fale ua na o faavae o fale ua nuti uma i lalo.

O faleaoga ma falemai faaatasi ma fale o aiga ua leai ma se mea o toe tu ua malepe uma i lalo ma tafia i tafega.

I le lipoti lava lenei na faaalia ai itu o loo moomia vave e pei o le suāvai, faleie ma vaega e teu ai le suāvai faapea ai ma taumafa.

Ua faailoa mai foi e oo mai i le taimi nei e le’i ola lava le eletise i le motu o Koro ma o loo faaauau pea ona tuuina atu fesoasoani mo tagata o le motu o Koro.

O le motu o Koro o loo i le itu o Vitilevu ma ua faaalia foi le toatele o i latou ua saili fesoasoani atu mo ni mapusaga ona ua leai ni mea e nonofo ai.

O le popolega sili ua i ai nei ona ua faailoa mai se atugaluga o le toatele ona e ono i ai se faama’i o le a tula’i mai ai.

Ua faailoa foi i le lipoti lenei le matautia o le faateteleina o le namu i le motu ma ua fai ma popolega sili o le Matagaluega o le Soifua Maloloina i totonu o Fiti.

Ua faailoa mai foi e le Sooupu e faapea, o loo ua amata foi ona faailoa atu nisi o fesoasoani mai itu eseese o le lalolagi mo Fiti.

Ua faamauina foi i le tala faasolopito o le Malo o Fiti, o se afā uiga ese lenei le malosi ua aafia ai lo latou atunuu pe a fua i tausaga ua alu.

I Samoa lava ia, e tusia lenei lipoti e le’i faamautu mai se meaalofa a Samoa mo Fiti ona o lenei mafatiaga.

Share This

About the author