Tusia Fuialo Ulafala Seupule

O loo tatou feola ma soifua i le soifuaga e felutiaina i le tele o gaosa faatasi ai ma le anoanoai o mea e tutupu mai lea taimi i lea taimi.

Ua mautinoa foi i le lalolagi lenei tatou te soifua ma ola ma le talitonuga e lē lelei pea aso uma.

E afua ai upu faalagi i nisi taimi o le taimi e timu ai ma le ituaso e mu tinitini ai le la.

E faalēogalua foi nisi taimi, aua e mafai ona timu ao la e susulu malosi le la, ona lilifa lea o fasaga a le tagata ola i suiga maaleale ua i ai nei le tau.

Ua ioeina lea mau tauave pe a fua i suesuega ma tali faavae mai iā latou ua i ai tomai i nei itu o le soifuaga.

O le fenumia᾿i la o le soifua o le tagata e afua ai ona mapuna ae ai ma isi talitonuga e matuā leai ni faavae.

Ua masani la tatou faalogo i upu fai mai ua lata mai le iuga o le lalolagi, ae molitai mai lagona fai mai e fua i mea e tutupu i le vaai a le tagata.

Ao le itu malie, o le matamata tetele o mau a le Tusi Paia e uiga i le mataupu nei o le iuga o le lalolagi, tasi o le mea ne᾿i fenumuiai le uto ma le maene ona faitauina lea o se faatauvaa.

Ua le ese ia lagona ma le anoanoai o mau lē faavaea e ala i tusitusiga i nisi o nusipepa e faatatau i le Malo.

O le itu malie i le vaega lea, e tiga ona vaai tino i suiga lelei ma le anoanoai o galuega ua tino mai mo le lelei o Samoa, ae lemafai lava le saga faaleaga pea o le Malo.

Ua vaai tino, ua pa᾿i foi ma ua soifua ai ma ola ai i nei suiga matagofie sa manatu poo afea a oo i ai Samoa.

A fua la i nei ituaiga mafaufauga soona fai, e lagona ootia ai lava le loto ma vaai atu ma le lagona alofa i Taitai o le atunuu ma le tautigā o fai nei.

O le fesili tele lava e tulai mai, o ai se Samoa e toe fia foi e mu i le moli popo ?, ao ai se Samoa e toe fia sopo ?, ao ai se tautai ma᾿ema᾿e o toe fia tuli atu i se vaaalo?, se Samoa e manatu e toe foi i le olaga pologa sa i ai aso ua tea?, aua o le uiga loloto na o mau faitioga pe a vaili loa ona itu loloto.

O lona uiga a faafaigofie le mataupu nei, o nei tagata e faitio i atinae ma galuega o taumafai le Malo mo le manuia lautele o le atunuu, e mumusu i se Samoa manuia.

E i ai foi le talitonuga latou te leo lagona tele le aogā ma le tāua o nei atinae, aua foi o latou o tagata o loo maua mea, latou te leo lagonaina le iuleo o tagata lima vaivai lea e afua ai taumafaiga a le Malo ina ia maua se fesoasoani mo i latou nei.

Ia manatua lelei e leai se Malo valea e faia ni fuafuaga ia pagatia ai le atunuu, e tasi le faamoemoe o soo se Malo o le lalolagi ia manuia tagata uma o sea atunuu.

O le mea lea ua mautinoa o le taumafai atu lava o lea atinae, lagatila mai faitioga ma le anoanoai o iuleo o le faitio, ma upu taufaasēsē.

Ae o le faafetai tele lea auā ua manino e le o toe pepeloa foi tagata i upu taufaaleaga ma manatu lē faavaea ua latou malamalama.

Ua moni ai le āgaga o loo ae nei, ua telē lava le suiga o Samoa.

A faapefea ona talitonu tagata o lea ua vaai ma ua ola i suiga lelei e pei ona tatou sapi ai i taimi nei.

Ae a le vaai agai i tua i le 20 tausaga talu ai, tatou te molimau faatasi i le faigata ma le pologa sa i ai na aso.

O le itu tāua lea i se lagona aua ana faapea e toloi ma tuu le Malo i nei mau faitioga, o le mea mautinoa e oo mai i le asō o loo tatou i ai pea i le lalolagi tuai o le mativa.

Ao le loto faafetai ae foi lea i le Atua, ona o le talitonuga o tagata o si o tatou atunuu, e le o mafai ona aveesea la latou faatuatuaga i le taitaiga a le Faiga Malo o loo i ai.

Aua a fesili pe se a lona mafuaaga ?

Ua vaai tino ma olaina suiga lelei e pei ona sapi ai ma ua latou talitonuina le suamalie o ia suiga mo aso uma.

O le pogai o le feteenai o lagona ona o le tausili i le mea e le oo i ai le malosi faatasi ai ma mafaufauga soonafai ina ia maua sona viiga.

Ae ua le o lea le faamoemoe sa᾿o, aua e ui ina pouliuli vasaga o le foafoaga, ae o le mea mautinoa, e tuanai le po,  ae fotu mai malama ma malagia ai le mea moni o le alofa i le atunuu,  o le pogai o taumafaiga uma o loo faia e le Malo.

E lē mafai la e se isi malosi ese ona tafia fuafuaga lelei auā ua maea ona faufau ma faatulaga lelei mea uma mo le manuia au i luma.

O le uiga o lea mea, e le o faia autagoa le fauga o le Malo, o loo fai i taiala na matuā fefulisa᾿i ai le tofa ma le faautautaga, aua atinae e manuia ai le atunuu.

Ne᾿i galo e le o upu ao galuega.

Share This

About the author