Mamea Ulafala

O le fesili lea ua taulai i ai le vaai a tagata lautele ina ua maea faalauiloa le ripoti autu o le Tusiga Igoa o le 2011 i le Aso Faraile o le Vaiaso talu ai.

Na molimauina i lea ripoti le paū o le faitau aofai o nisi o Ekalesia tetele i totonu o le atunuu.

O le mea na matauina i lea aso o le tuumumusu o nisi i le paū televave o le fuainumera o tagata lotu i ia Ekalesia.

O faamaumauga a le Ofisa o Fuainumera Faamaumauina e tusa o le ripoti e pei ona taua i luga,na ese ai le lagona ma toe tau to manatu ai pe se a lona mafuaaga.

Aua afai o Ekalesia na mua i malae ma fai ma uluai Ave o le Talalelei, e faapefea ona toatele atu le faitauaofai o nisi Ekalesia e lei leva ona taunuu mai i Samoa pe a fua i ona Tala Faasolopito.

E le afaina i le lagona o le Tusitala le filifiliga saoloto a le tagata ma le Ekalesia ua manatu e tapuai ai,a e o le itu e fia faamamafa e tasi le Auga o Aute i Lē o loo fai i ai le Tapuaiga.

Ae faapefea la ona toatele tagata lotu a le Ekalesia na mulimuli taunuu mai i Samoa nai lo le Ekalesia na mua i malae ao le Atua lava e tasi o tapuai i ai ?

O le faatinoga o Tapuaiga ma auala o Sauniga o le isi lea itu i le tali a nisi o tagata ua o ese mai nisi o Ekalesia tetele i totonu o le tatou atunuu.

O le faigofie ona liua o le olaga tuai sa i ai e ala i faiga faavae ma taiala o lima taitaiina ai le Faavae o lea Ekalesia o le isi lea mafuaaga i le mau a nisi.

Ao se lagona vaivai o le Tusitala  atonu e sao i nisi o lagona manatu e pei ona taua i luga i le faatupulaia o le o ese o tagata lotu o le i si Ekalesia ma
agai atu i le isi Ekalesia.

O le itu muamua lava e tatau ona tilotilo i ai o le maaleale o le tamaaoaiga o le lalolagi ua i ai nei,ua manatu e telē foi sona sao i Ekalesia ma ona tagata lotu.

O le fesiitaiga o le tau o le soifuaga mai lea taimi i lea taimi,ao le mea ua mautinoa e leo fuaina faapea mea fai a nisi o Ekalesia.

O le mea ua tupu,fesiitai le tau o le soifuaga,maaleale le tamaaoaiga o le lalolagi ua lavea atu ai ma Samoa,ao tumau pea le sasao atu o mea fai i tagata lotu.

O le toesea o isi tagata, e lē o fai ma ala e faaitiitia ai mea fai aemaise lava i itu tau tupe,o lona uiga toalaiti tagata, tumau pea le tele o mea fai tupe, o le tali ua avega ma le faafafa, toe apata atu ua sui le Ekalesia.

E le aiāina e Moo liu  o vaa, e pei o le tala i le lavelave o le upega o Leifi ma Tautoloitua, ma le mau Faa-Ātua i lea tala a le atunuu, a e ua na o ni lagona faatupu manatu,pe le o le tele ea o mea fai ua o ese ai tagata lotu mai i Ekalesia na mua i malae,i Ekalesia na mulimuli mai.

Share This

About the author

Palemia Ugapo