Mo le silafia e le mamalu o si o tatou atunu’u o lo o papaa’ao i atunu’u i fafo i mataupu tau le Faamasinoga o Fanua ma Suafa i masina ta’itasi, o lea o le a amataina ai le tautua lenei o le Savali o le tu’uina atu o nei faamaumauga i lenei upega-o-faamatalaga i masina uma.

O le a taga’i pea le pulega i auala e faaleleia atili ai lenei tautua.

Faatonu

ALC.6625 P.1.

ITU TAGI: Vaifale Mokoi o Samalaeulu. Ph#.7771828.

ITU TETEE: Fulu Mose o Samalaeulu.

MATAUPU E SUEINA: E uiga i le pule o le fanua o MAALI i Samalaeulu Lealatele Savaii.

UIGA O LE TAGI: Ina ia faia se poloaiga e faamaonia ai:

(1.        O le igoa sa’o o le fanua ua finau ai o Maali, ae le o Alatutuli.

(2.        O le pule o le fanua lenei o Maali i Samalaeulu, ua iai lea ia Vaifale Mokoi ma ona suli.

(3.        O lenei fanua na maua mai i vaevaega ma tofitofiga fanua ma eleele a Alii ma Faipule o Samalaeulu.

(4.        Matua taofia loa le aiaina fua e le itu tetee o le fanua lenei o Maali i ona mafuaaga o le a faamatalaina i le tiami o le faigasuega.

ASO E FAIA AI:  Aso Lulu aso 23 Mati 2011 i le itula e 9.00 i le taeao.

 

ALC.6631 P.3.

ITU TAGI:  Tuisalega Opetaia ma lona aiga i Faiaai.

ITU TETEE: Loli Seanoa o Vaipua.

MATAUPU E SUEINA: E uiga i le suafa SIALIITU i Faiaai.

UIGA O LE TAGI: Ina ia faia se poloaiga e faamaonia ai:

(1.        O le suafa Sialiitu o le pitofanua o Tuisalega.

(2.        E leai se suafa Sialiitu i Vaipua ma e latou te lei faatinoina lava lea suafa.

(3.        Teena loa vaega uma o le talosaga a Loli Seanoa.

(4.        Ia faamaonia loa nofo uma sa faia e Tuisalega i le suafa Sialiitu e fai ma na pitofanua.

ASO E FAIA AI:  Aso Gafua aso 04 Aperila 2011 i le itula e 9.00 i le taeao.

 

ALC.5622 P.30.

ITU TAGI: Vaitogi Potifara o Safotu.

ITU TETEE: Aufai Toma Lemi o Saleaula.

MATAUPU E SUEINA: E uiga i le Pule o le fanua o ALAILEPULE  i Saleaula.

UIGA O LE TAGI: Ina ia faia se poloaiga e faamaonia ai:

(1.        O le fanua ua finau ai nei, ua maea i ai le faaiuga a lenei Faamasinoga mamalu o le aso 16/7/2088 ALC.5622 P.25 – P.28, ma ua faamaonia ai o lenei fanua, o le tualaoa o le suafa Levaopolo i le itupaepae o Laupata i Saleaula, lea e tulai atu ai lenei itu tagi.

(2.        Ua le aloaia e le Itu Tetee (Aufai Toma Lemi) lenei faaiuga e pei ona taua i luga e ala i lona toe fausia ai o lona fale fou o loo i ai nei.

(3.        Ia faia loa se poloaiga a lenei Faamasinoga mamalu, e tala ese ai ma tulai ese le Itu tetee mai lo matou fanua, ma ia faapea foi ona faia ni moliaga faasaga ia te ia, i lona le usitaia ma aloaia o le faaiuga a le Faamasinoga e pei ona taua.

ASO E FAIA AI: Aso Lua aso 17 Me 2011 i le itula e 9.00 i le taeao.

 

ALC.6652 P.1.

ITU TAGI:  Leautuli Suki Sua Samuelu i Salelologa.

ITU TETEE: Taotua Ioane, Taotua Manuele, Taotua Fonofili, Taotua Malu, Taotua Fiti o Salelologa.

MATAUPU E SUEINA: E uiga i le soloia o le lisi a suli o Taotua Potoae ua faasalalauina i lo matou fanua o MATAUPOLU i Salelologa e pei ona faasalalauina i le Savali aso 28/11/2010.

UIGA O LE TAGI:  Ina ia faia se poloaiga e faamaonia ai:

(1.        O le fanua o loo faasalalauina e le itu tetee o le fanua o le suafa Su’a lea sa suafa ai Su’a Samuelu o le tama o le itu tagi.

(2.        O le faatoaina ma le nofoia o lenei fanua mai le amataga sa ia Sua Samuelu, lea e tupuga mai ai le itu tagi.

(3.        E lei logoina le itu tagi poo suli o Sua Samuelu mo so latou maliega i le faiga o lenei lisi.

(4.        Ia soloia loa ma faaleaogaina le lisi e pei ona faasalalauina i le Savali o le aso 28/11/2010.

ASO E FAIA AI: Aso Lua 07 Iuni 2011 i le itula e 9.00 i le taeao.

 

ALC.2052 P.1.

ITU TAGI: Sina Lauano Alatina Patu Fereti o Matautu (apia) – Ph# 23455/7733503.

ITU TETEE: Tagaloa Gasologa ma Tagaloa Fuatoa o Tapueleele.

MATAUPU E SUEINA: E uiga i le soloia o le nofo a Sharon L. Georgi ua faia i le suafa PATUTELE o Tapueleele e pei ona faasalalauina i le Savali 28 Tesema, 2010.

UIGA O LE TAGI:  Ina ia faia se poloaiga e faamaonia ai:

(1.        O le itu tagi ma le itu tetee e aia tutusa i le filifilia o se nofo po o ni nofo i le suafa ua finau ai e pei ona faamaonia i le ALC.1542 o le 1973.

(2.        E leai se maliega o le itu tagi ma e lei logoina foi i lenei nofo ma ia soloia loa.

ASO E FAIA AI: Aso Lulu aso 08 Iuni 2011 i le itula e 9.00 i le taeao.

 

ALC.2066 P.3.

ITU TAGI:  Tagaloa Toni Faataape Simi o Vaipuna – Ph# 8424594.

ITU TETEE: Suli o Patutele Simona o Tapueleele, c/- Tagaloa Pepe Seleni.

MATASUPU E SUEINA:  E uiga i le nofo a Ricky L. Georgi e pei ona faasalalau i le Savali aso 28/12/2010 i le suafa TAGALOATEA o Tapueleele.

UIGA O LE TAGI: Ina ia faia se poloaiga e faamaonia ai:

(1.        Ia faamaonia pea le mamalu ma le aloaia o le faaiuga, ALC.2166, aso 19/4/1977.

(2.        O le itu tagi o suli moni o le suafa Tagaloatea o Tapueleele.

(3.        E lei logoina le itu tagi mo sona maliega i le faia o le nofo a Ricky L. Georgi i le suafa Tagaloatea o Tapueleele.

(4.        Ia soloia loa le nofo a Ricky L. Georgi i le suafa Tagaloatea.

ASO E FAIA AI: Aso Lulu aso 08 Iuni 2011 i le itula e 9.00 i le taeao.

 

ALC.4513 P.64.

ITU TAGI: Seumanutafa Samuelu Ualesi ma Mulipola Vaitogi Isaraelu o Fagalii, Ph 7772484.

ITU TETEE: Seumanutafa T. Falemai ma Seumanutafa T. Malaki o Falealupo.

MATAUPU E SUEINA: E uiga i le soloia o nofo a Samuelu, Naomi, Galuega, Malaea, Stevenson, Saipolua, Samisoni ma Tanielu ua fai faamalosi i le suafa SEUMANUTAFA o Falealupo lea ua faasalalauina i le Savali 28 Novema 2010.

UIGA O LE TAGI:  Ina ia faia se poloaiga e faamaonia ai:

(1.        O le itu tagi o suli moni o le suafa Seumautafa o Falealupo ma o loo umia le suafa i le taimi nei.

(2.        Ia soloia ma faaleaogaina nofo ua faia faamalosi i le suafa Seumanutafa ona e lei iai se maliega a le Itu Tagi.

ASO E FAIA AI:  Aso Tofi aso 09 Iuni 2011 i le itula e 9.00 i le taeao.

 

ALC.6654.

ITU TAGI: Amituanai Taugofie, Tapaau Tauo S.P. Cowley, Tauo Taufesala, Tauo Iasepi, Tauo Sam S.P. Cowley, Tauo Fune o Vaisala.

ITU TETEE: Tuimaualuga Filo ma Loluama Tuimaualuga o Tufutafoe.

MATAUPU E SUEINA: E uiga i le Pule o le fanua o ILIILI i Vaisala.

(1.        O le igoa sao o le fanua o loo finau ai o Iliili i Vaisala ae le o Saminatoto e tusa ma le taofi o le itu tetee.

(2.        O le pule o le fanua o Iliili e pulea lea e suafa Sa’o o le aiga o Amituanai ma Tauo.

(3.        O le itu tetee e nonofo mau lava i latou i Tufutafoe, e leai se isi e nofo i Vaisala.

(4.        O se faatupu vevesi ma faamalepe aiga le omai o le itu tetee mai Tufutafoe ma fai faamalosi le fale i luga o le fanua e aunoa ma le maliliega o Suafa Sao o le aiga e pulea le fanua.

(5.        Ia talaese loa le fale tumau o le itu tetee lea ua faia faamalosi i luga o lo matou fanua o Iliili i Vaisala.

ASO E FAIA AI:  Aso Gafua aso 13 Iuni 2011 i le itula e 9.00 i le taeao.

 

ALC.6654 P.1.

ITU TAGI: Alaelua Filoimalo, Alaelua Etene, Alaelua Salefu, Mosotele Loluama, Taoauvao Isaleli, Aumua Malumalu, Taoauvao Finauga Telefoni 7717374/7763583.

ITU TETEE: Amituanai Taugofie, Tauo Fune, Tauo Taufesala, Kale Tauo o Vaisala.

MATAUPU E SUEINA: E uiga i le pule faavae o le Fanua o SAMINATOTO i Vaisala.

UIGA O LE TAGI: Ina ia faia se poloaiga e faamaonia ai:

(1.        O le igoa sa’o o le fanua ua finau ai o Saminatoto ae le o Iliili e tusa ma le taofi o le Itu Tetee.

(2.        O le fanua o Saminatoto o le fanua faavae o le suafa Alaelua o Vaisala.

(3.        Ia faamaonia e leai se fanua o Ajmituanai ma Tauo e igoa o Iliili, seia vagana le suafa Gale e faasino tonu iai le fanua lenei o Iliili.

(4.        Ia faatonuina Amituanai Taugofie ma Tauo Seki ina ia toe ati le pa maa a le Itu Tagi i lona tulaga sa iai lea na latou laueseina ma faaleagaina.

(5.        Ia faatumauina pea le fale tumau o le Itu Tagi i lo matou fanua o Saminatoto, aua o le ono (6) ai lea o fale tumau ae lei faalavelaveina e le Itu tetee.

ASO E FAIA AI:  Aso Gafua aso 13 Iuni 2011 i le itula e 9.00 i le taeao.

 

ALC.6655.

ITU TAGI: Mafi Faamoe Taviuni mo Suli o Faamoetauloa Sou Farani o Lelepa.

ITU TETEE: Samu Sou Farani o Lelepa.

MATAUPU E SUEINA: E uiga i le Pisinisi Faleoloa i le fanua o LEONE i Lelepa P.V. 02/2010 – Savali 28 Novema 2010.

UIGA O LE TAGI: Ina ia faia se poloaiga e faamaonia ai:

(1.        Ua faia faamalosi e le itu tetee le faasalalauga o le faleoloa e aunoa ma le maliliega o suli o Faamoetauloa Sou Farani.

(2.        O le fanua e faasino tonu i suli moni o Faamoetauloa Sou Farani.

(3.        Ia soloia loa ma faaleaogaina le faasalalauga o le Pisinisi e pei ona taua ona e lei logoina le itu tagi mo so latou maliliega.

ASO E FAIA AI: Aso Lua aso 14 Iuni 2011 i le itula e 9.00 i le taeao.

 

ALC.6655 P.1.

ITU TAGI: Liua Sou o Lelepa – Ph# 7233740.

ITU TETEE: Samu Sou Farani o Lelepa.

MATASUPU E SUEINA: E uiga i le Pisinisi Faleoloa i luga o se vaega o le fanua o LEONE i Lelepa.

UIGA O LE TAGI:  Ina ia faia se poloaiga e faamaonia ai:

(1.        O le fanua o loo finau ai nei o Leone i Lelepa ma e aia tutusa uma iai le itu tagi ma le itu tetee.

(2.        Ua lisi faamalosi e le itu tetee le fanua e aunoa ma so matou maliliega iai.

(3.        Ia soloia loa ma faaleaogaina le Lisi Faleoloa e pei ona faasalalauina i le Savali 28 Novema 2010 ona e toatele i matou e lei malilie i le faia o lea Lisi.

ASO E FAIA AI: Aso Lua aso 14 o Iuni 2011 i le itula e 9.00 i le taeao.

 

ALC.4901 P.3.

ITU TAGI: Taulapapa Galuva’a Pati o Fogapoa.

ITU TETEE:  Moananu Joe Taulapapa o Fogapoa ma Vaitele.

MATAUPU E SUEINA: Aveeseina o le suafa MOANANU mai ia Joe Taulapapa.

UIGA O LE TAGI:  Ina ia faia se poloaiga e faamaonia ai:

(1.        O Moananu Joe ua fai lava si tele o mea le manuia ua tulai mai ai i totonu o le aiga ma ua faamaualuga naua ma ua ia le toe amanaiaina i matou sa mafua ai ona ia umiaina le suafa e pei ona i ai i le aso 30/05/96.

(2.        Ua tele foi mea ua tauvalea ai le matou aiga i le va ma le nuu peitai o le a ou faaalia i le taimi o le faamasinoga.

(3.        O le tele foi o taimi ua teena e Joe lo matou tama o Taulapapa Pati sa ala mai ai i Fogapoa ae ua ave lava lona tama o Sekone.

(4.        O lea ia aveesea loa le suafa Moananu mai ia Joe faapea le fanua o loo nofo ai ona ua le toe fia amanaiaina lo matou tama o Taulapapa Pati sa mafua ai ona ia pai i le suafa Moananu.

ASO E FAIA AI:  Aso Lulu aso 15 Iuni 2011 i le itula e 9.00 i le taeao.

 

ALC.6656.

ITU TAGI: Taulapapa Galuva’a Pati mo suli o Taulapapa Pati i Fogapoa.

ITU TETEE: Faavaoa Moananu Joe ma lo latou aiga i Fogapoa.

MATAUPU E SUEINA: E uiga i le faatulaieseina mai o Faavaoa Moananu Joe ma lona aiga mai le fanua o LEPULE i Fogapoa, Safotulafai, Savaii.

UIGA O LE TAGI: Ina ia faia se poloaiga e faamaonia ai:

(1.        O Faavaoa ma lo latou aiga ua tele tulaga mataga ua latou faia e ono lepetia ai le nofo lelei o lenei aiga e le gata i le va ma le aiga potopoto ae o le nuu.

(2.        O le a ou faaalia i le aso o lenei faamasinoga nei tulaga uma.

(3.        Ia tulai ese loa Faavaoa ma lona aiga mai le fanua o loo latou nofoia nei.

ASO E FAIA AI:  Aso Lulu aso 15 Iuni 2011 i le itula e 9.00 i le taeao.

 

ALC.6168 P.4.

ITU TAGI: Levaopolo Latafoti o Saleaula (Ph: 7209680).

ITU TETEE: Alii ma Faipule o Saleaula, c/o Susuga i le Pulenuu Saleaula.

MATAUPU E SUEINA: E uiga i le faateaina o Levaopolo Latafoti mai le faiganuu a Saleaula.

UIGA O LE TAGI:  Ina ia faia se poloaiga e faamaonia ai:

(1.        E tusa ai ma le finagalo o le Afioga i le Peresetene o le aso 2/2/11, ua toe faauluina ai lenei talosaga mo se faaiuga a le Faamasinoga.

(2.        E leai se agasala matuia po o ni amioga mataga ua faia e le Itu Tagi, e ono faateaina mai ai mai le osiganuu a lo matou nuu o Saleaula.

(3.        E lei uia foi e Alii ma Faipule o Saleaula, tulaga o le Tulafono o Fono a Nuu, i le faateaina o le Itu Tagi, e ala lea i le togisala muamua, ona faatoa faia ai lea o sa latou faaiuga i le faateaina o le Itu Tagi.

(4.        Ua le tusa ai ma le aganuu ma agaifanua a lenei nuu, le faateaina o le Itu Tagi, ona e lei tu mai se tootoo i le aso sa faateaina ai le Itu Tagi.

(5.        Ua maea foi le fonotaga a le nuu, ma ua toe faaeaina uma matai sa totua mai le faiganuu, ae o lo o tumau pea le faateaina o le Itu Tagi, ma se tasi o matai o lenei nuu, ma e matua leiloa se mafuaaga.

(6.        Ia faia loa se faaiuga a lenei Faamasinoga mamalu, e toe foi filemu ai le Itu Tagi i le osiganu a Saleaula, ona o le faia tautua pea i le nuu na ola ma soifua mai ai.

ASO E FAIA AI:  Aso Tofi aso 16 Iuni 2011 i le itula e 9.00 i le taeao.

 

ALC.6598 P.2.

ITU TAGI:        Semau Toalepai o Saleaula (Ph:7748806).

ITU TETEE:     Alii ma Faipule o Saleaula, c/-o susuga i le Pulenuu Saleaula.

MATAUPU E SUEINA: E uiga i le faateaina o Semau Toalepai mai le osiganuu a Saleaula.

UIGA O LE TAGI:         Ina ia faia se poloaiga e faamaonia ai:

(1.        Ona o le finagalo o le Afioga i le Peresetene o le aso 13/12/2010, ua toe faauluina ai lenei talosaga mo se faaiuga a le Faamasinoga.

(2.        Ua maea le faaiuga a le Faamasinoga ma ua talia lelei e le Itu Tagi le finagalo o le Faamasinoga sa tuuina mai, ma o lo o totua pea le Itu Tagi mai le osiganuu a Saleaula e oo mai i le taimi nei.

(3.        I le fonotaga a lo matou nuu ia Tesema 2010 mo le toe teuteuina o lo matou nuu, sa fai le ifoga a le Itu Tagi ma faatoese le Itu Tagi i le nuu, ae peitai sa tumau pea le faateaina o le Itu Tagi, ae faaae na o isi matai sa totua mai le faiganuu.

(4.        Ona o le fia tautua pea o le Itu Tagi i le osiganuu a lo matou nuu o Saleaula, o lea ua talosagaina ai se faaiuga a lenei Faamasinoga mamalu, e toe foi ai le Itu Tagi i le osiganuu a lo matou nuu o Saleaula.

ASO E FAIA AI:           Aso Tofi aso 16 Iuni 2011 i le itula e 9.00 i le taeao.

 

ALC.4915 P.14.

ITU TAGI:        Leata Leota Savaiinaea ma Malaga Naia Savaiinaea o Tulaele ma Faiaai Savaii. Ph 26983/8406002.

ITU TETEE:     Savaiinaea Sani o Salailua.

MATAUPU E SUEINA: E uiga i le soloia o le nofo a Iosefa Misieli ua faia faamalosi i le suafa SAVAIINAEA i Salailua sa faasalalauina i le Savali 28 Ianuari 2011.

UIGA O LE TAGI:         Ina ia faia se poloaiga e faamaonia ai:

(1.        O loo manino i le faaiuga a le faamasinoga i le tausaga 1994 e le toe faia seisi nofo fou i le suafa Savaiinaea sei vagana ua malilie faatasi uma le aiga potopoto.

(2.        Ia soloia ma faaleaogaina le nofo a Iosefa ua faia faamalosi i le suafa Savaiinaea e aunoa ma se logoina o le Itu Tagi o suli moni o le suafa.

ASO E FAIA AI:           Aso Gafua aso 20 Iuni 2011 i le itula e 9.00 i le taeao.

 

ALC.4759 P.4.

ITU TAGI:        Lauafia Manoifoa Malaki o Vaivase-uta Tel 7771408.

ITU TETEE:     Vaiao Laumoli o Foailuga ma Aumoe Lolagi Leota o Tuaefu.

MATAUPU E SUEINA: E uiga i le soloia o nofo a Lolani Leota ma Katie Sanele Moananu ua faia faamalosi i le suafa LAUAFIA o Foailuga na faasalalau i le Savali aso 28 o Tesema 2010.

UIGA O LE TAGI:         Ina ia faia se poloaiga e faamaonia ai:

(1.        E leai se pule faa Vaiao ma Aumoe e faia ai se nofo poo ni nofo i le suafa Lauafia i Foailuga.

(2.        Ua le usitaia e le Itu Tetee le faaiuga o le Fasamasinoga ALC.4759 P.1 – P.3 Vaega 2 (e).

(3.        Ua na o i latou lava o loo umia le suafa Lauafia mai i lea taimi i lea taimi e faapogai i le faiga o nofo poo ni nofo i le suafa Lauafia.

(4.        Ia soloia loa nofo a Katie Sanele Moananu ma Lolani Leota ua faia faamalosi e le Itu Tetee e aunoa ma se maliega o le Itu Tagi.

ASO E FAIA AI:           Aso Lua aso 21 Iuni 2011 i le itula e 9.00 i le taeao.

 

ALC.6657.

ITU TAGI:        Suisala Luteru Matautia, Mataena Salesa o Sataua.  Telefoni 7224050/7614683.

ITU TETEE:     Vaelua Isara Lesatele o Sataua.

MATAUPU E SUEINA: E uiga i le pule o le fanua o TUPUGA i Sataua.

UIGA O LE TAGI:         Ina ia faia se poloaiga e faamaonia ai:

(1.        O le fanua ua finau ai e faasino tonu i le suafa Matautia o Sataua lea e suli mai ai le Itu Tagi.

(2.        O le faaaogaina ma le nofoia o lenei fanua mai le amataga ao soifua Matautia siliga ua nao le Itu Tagi lava sa ia faatoaina, galueaina ma nofoia e oo mai lava i le taimi nei.

(3.        Ua fausia faamalosi le fale o le Itu Tetee ma atiina le pa i totonu o le fanua e aunoa ma se logoina o le Itu Tagi, ma sa taofi atu foi e le Ofisa ma faatino ai la matou feiloaiga peitai e matua le amanaia lava.

(4.        Ia tulaiese loa le Itu Tetee ma aveese uma ana meatotino o loo i luga o lenei fanua ona ua tele le faamaualuga ma faatupu vevesi i lo latou va ma le itu Tagi.

ASO E FAIA AI:           Aso Lulu aso 22 Iuni 2011 i le itula e 9.00 i le taeao.

 

ALC.6658.

ITUTAGI:         Loli Ioane o Vaipua – Ph 7723132.

ITU TETEE:     Fualau Seleni o Faiaai.

MATAUPU E SUEINA: E uiga i le pule i se vaega o le fanua o LEALATAGA i le Eka i Vaipua.

UIGA O LE TAGI:         Ina ia faia se poloaiga e faamaonia ai:

(1.        O le pule i se vaega o le fanua o Lealataga i le eka i Vaipua, e iai lea i le suafa Loli mai suli o Loli Mafuatu lea e tulai atu ai le Itu Tagi.

(2.        O lenei fanua o le tofi o Loli Mafuatu na maua mai vaevaega o fua a Alii ma Faipule o le Ekalesia Faapotopotoga Kerisiano Samoa i Vaipua.

(3.        Ia matua taofia i se poloaiga a le Faamasinoga mamalu le aiaina e le itu tetee o le fanua o le itu tagi ona e leo se suli o Loli Mafuatu.

ASO E FAIA AI:           Aso Tofi aso 22 Iuni 2011 i le itula e 9.00 i le taeao.

 

ALC.6152 P.2.

ITU TAGI:        Vaaelua Saoaumaga Seiuli o Leufisa/Lalomalava Mo Suli o Vaaelua Failauga. Ph:23786.

ITU TETEE:     Amosa Reupena, Simolo Reupena, Eteuati Reupena ma isi o Lalomalava/Vaimoso.

MATAUPU E SUEINA: E uiga i le tau-faanofoina o Pule Vaaelua Taugata ma Asosi Ah Pigi i le Suafa VAAELUA o Lalomalava, pei ona faasalalauina i le Savali aso 28 Novema 2010.

UIGA O LE TAGI:         Ina ia faia se poloaiga e faamaonia ai:

(1.        O matou o suli moni, e suli mai ia Vaaelua Failauga o Sapulu Lalomalava, e aia i le filifilia po o le tofiaina o se nofo i le Suafa.

(2.        E lei logoina i matou o lo o nonofo i le aiga i Lalomalava.

(3.        Ia soloia ma faaleaogaina loa lenei faasalalauga.

ASO E FAIA AI:           Aso Gafua aso 27 Iuni 2011 i le itula e 9.00 i le taeao.

 

ALC.2134 P.1.

ITU TAGI:        Tuala Vaisualao Kasipale o Leauvaa.

ITU TETEE:     Tuala Ioane ma le aiga o Patamea ma Puapua.

MATAUPU E SUEINA: E uiga i le talaeseina o fale ma tulaiese le Itu Tetee mai luga o le fanua o FOGAVAIONE i Patamea e faasino i le suafa Tuala o loo umia e le Itu Tagi, ua maea i ai le faaiuga ALC.2134 aso 6/4/1978.

UIGA O LE TAGI:         Ina ia faia se poloaiga e faamaonia ai:

(1.        O le fanua o Fogavaione ua maea i ai le faaiuga ALC.2134 aso 6/4/1978 e pulea e le suafa Tuala o loo umia e le Itu Tagi.

(2.        E lua fale ua faia e le Itu tetee i luga o lenei fanua e aunoa ma le aloaia poo se maliega o le Itu Tagi pei ona faia ai feiloaiga i le Ofisa i Tuasivi aso 30/7/2010 ma le aso 10/2/2011.

(3.        Ia talaeseina loa fale ma tulaiese le Itu tetee mai le fanua e pulea ma faasino i le itu tagi.

ASO E FAIA AI:           Aso Lua aso 28 Iuni 2011 i le itula e 9.00 i le taeao.

 

ALC.6659.

ITU TAGI:        Faitau Solomona, Faitau Kiso, Utuutu Alosio, Aumua Afa, Moso Malaesaili o Fagasa Sataua.  Telefoni 7749053/58059.

ITU TETEE:     Tuiloma Viliamu ma Sua Afereti o Fagasa Sataua.

MATAUPU E SUEINA: E uiga i nofo ua faia i le suafa FAAVAE o Fagasa Sataua.

UIGA O LE TAGI:         Ina ia faia se poloaiga e faamaonia ai:

(1.        O le suafa Faavae o le suafa e faasino tonu i le Itu Tagi.

(2.        O le ioega a le Itu Tagi na mafua ai ona faamatai Siaki ma Uali i le suafa Faavae, peitai ua aliali mai ua fia pulea e le Itu tetee lenei suafa.

(3.        Ua le talafeagai le faapogai mai o Lisi i le nofo a Siaki lea o loo faaalia i le Savali 28/01/2011 ona ua leva ona maliu ae o nofo faatoa faatino i le masina o Ianuari 2011.

(4.        Ia soloia loa ma faaleaogaina le nofo a Siaki lea ua faasalalau mai i le Savali 28 Ianuari 2011.

ASO E FAIA AI:           Aso Lulu aso 29 Iuni 2011 i le itula e 9.00 i le taeao.

 

ALC.1171 P.2.

ITU TAGI:        Faitau Solomona, Faitau Kiso, Utuutu Alosio, Aumua Afa, Moso Malaesaili o Fagasa Sataua. Telefoni 7749053/58059.

ITU TETEE:     Tagaloa Ulisese o Fagasa Sataua.

MATAUPU E SUEINA: E uiga i nofo ua faia i le suafa TAGALOA o Fagasa Sataua.

UIGA O LE TAGI:         Ina ia faia se poloaiga e faamaonia ai:

(1.        O le suafa Tagaloa o le suafa e faasino tonu i le Itu Tagi.

(2.        O le ioega a le Itu Tagi na mafua ai ona faamatai Wayn i le suafa Tagaloa, peitai ua le talafeagai le faapogai o lenei nofo ua faasalalau mai ai i le Savali.

(3.        Ia faasa’o le faapogai o le nofo a Tagaloa Wayn e faapea – Faitau Solomona ma le aiga potopoto.

(4.        Afai loa e le utagia e le itu tetee se finagalo o le Itu Tagi ona soloia loa lea ma faaleaogaina le nofo a Wayn ua faia i le suafa Tagaloa.

ASO E FAIA AI:           Aso Tofi aso 30 Iuni 2011 i le itula e 9.00 i le taeao.

 

FAASILASILAGA:

PULEFAAMAU I LE FANUA ISE VAEGA O FATALOA I SALELOLOGA:

Ua faaalia le finagalo malie lelei o Pauli Baker ina ia pulefaamauina lona fanua ise vaega o FATALOA i Salelologa.  O lenei fanua na maua mai vaevaega a lo latou fuaiala o Sakalafai i Salelologa ma o le tele o lenei fanua e tusa lea ma le 16 Gafa le lautele, ae 100 gafa le umi. 

O tuaoi o lenei fanua e faapea – Saute ma Alii ma Faipule o Sakalafai, Matu ma le auala o Sakalafai, Sasae ma Pauli Tone, Sisifo ma Pauli Mataese.

Sainia:    Pauli Baker

 

PULEFAAMAU I LE FANUA ISE VAEGA O FATALOA I SALELOLOGA:

Ua faaalia le finagalo malie lelei o Pauli Tone ia pulefaamauina lona fanua ise vaega o FATALOA i Salelologa.  O lenei fanua na maua mai vaevaega a lo latou fuaiala o Sakalafai i Salelologa ma o le tele o lenei fanua e tusa lea ma le 16 Gafa le lautele, ae 100 Gafa le umi.

O tuaoi o lenei fanua e faapea – Saute ma Alii ma Faipule o Sakalafai, Matu ma le auala o Sakalafai, Sasae ma Pauli Apelu II, Sisifo ma Pauli Baker.

Sainia e:  Pauli Tone

Share This

About the author