Tusia ma tu’ufa’atasia: Tupuola Terry Tavita

Ua iite le malama i Saua, ua iite fanua-a-lalo ua toe ose aga sao le vaa i le ava.

Ua togi le apafoe selau ma ua tau faatili uma foe aua ua i le pani le sini o le faalagamaea a toeaiina. Ia ma nai lo’omatutua to’aitiiti.

Ua gatete ai aiga,o  nuu ma itumalo po o ai o le a manumalo, ae o ai fo’i o le a faalolo.

E tusa ai ma faigamalo faatemokarasi, o le filiina o se auvaa e tautaia se atunuu e i le filifiliga saoloto lava a le au palota.

O le uiga o lea palota, o lou tuuina atu lea o le pule i se sue tauva nate tauaveina mo le isi lima tausaga.

Ua loa ona silasila le atunuu I faiga faatosina mo le fia maua o lenei pule.

Tau ia ina avatu pea le tu’utu’u alalo a lenei nusipepa, aua ne’i seetia lau filifiliga i ni folafolaga ete silafia lelei e le sagatonu ma le olaga o loo tatou soifua ai i Samoa. 

Ia e faaeteete i sui e avatu ia te oe tupe ma meaai. Leaga o mea ia e aumai nei toe uma lava nei. E faamalieina ai le tagata mo se taimi puupuu. Tautuana ia tuutuu pea i le loloto le upega, ia silasila mamao i le manuia o le nuu ma le itumalo, aemaise fanau lalovaoa.

Ia e filifili i le ua afu lana tautua i le aiga, le ekalesia, le nuu ma le itumalo. O le e faamaoni ma e alofa moni i ona tagata.

Ia e tagai lelei i sui o le a tausinio, ona e fesili ifo lea, “sa tautua?�?  “e sa tautua lelei?�? pe mata e faaauau pea lena tautua pe a pale mai?�?

Ia e filifili lelei i le ua e mautinoa ua talafeagai ma le Sui o le Palemene, o le Faipule o le Malo Tutoatasi o Samoa.

Ia e saili i le sui e finafinau i mea lelei. E lagona le leo i le Palemene aua se manuia o le itumalo. Ae aua le aumaia ni sui na o le fia tietie taavale, faatigamata i falepia o le taulaga ma le tautulimoe solo i Ti’afau.

O tafa na o taoto ai lau palota.

I le faasolo mai o taitai iloga o le lalolagi. Mai ia Apereaamo, Mose, Tavita, Solomona, Tariu, Alesana le Sili, Asoka, Hanipale, Kaisara Iulio, se’ia o’o mai ia Kaisara Aukuso le na pulea Roma I le fanau mai o Iesu. Toe faasolo mai ia Aurelio Makusi, Moameta, Kanuti, Kana Kenisi, Kuna Kupalai ma Kana Kupalai, Sa Lui ma Sa Enele, Siaosi Uosigitone, Apeleamo Likeni, Viliamu le Nunu, Sale Te Kolo, Mao Situnu, Napoleone ma Nelesone, Lenini, Sitalini, Ioane Keneti,Nelesoni Manetela, Makereta Falesa o Peletania ma Opama – e tasi lava le mea e laugatasia ai I latou – o le faamaoni I le valaauina o I latou e pulea ma taitaiina atunuu.

Mo Isaraelu, e maoa’e le tula’i mai o a latou taitai ona o le mata’u ma le faatuatua i Le Atua.

E aoga foi le mau faailoga ma le i’u mai i Iunivesete. Peitai i Samoa lava ia, e taua lava le faamaoni. Le faamaoni I le mafutaga ma le aiga, le faamaoni I le mafutaga ma le Ekalasia, le faamaoni I le mafutaga ma le nuu aemaise le alofa faamaoni I le itumalo. Aua fai mai le upu o le tusi, faafefea ona e alofa I Le Atua e le vaaia ae e ita I lou uso lae lua te mafuta?

Ae faimai upu o le atunuu, Fili I le Tai se agavaa.

Aua e le iloa se tautai i le malu o le tai se’iloga e lutaluta ma sousou le gataifale ona iloa lea o tautai o le vasa, o taitai e alofa moni i ate oe ma a’u.

Sagai ifo la’ia lea e saili ni ai o le tai. Leaga o le sa o Samoa ua leva ona tauaalo ae o lea foi o le a toe tu’u i tai.

Saili le sui e manuia ai le itumalo ae e le o le sui o le a fai ma sasa i le isi lima tausaga. Ma ia e manatua, o lo’o see pea i luma le sa o le atunuu.

Ia manuia le faiga palota.

Lau X i ma’umau

Ua toe nei o nai itula,

Tu’u i tai lo tatou sa,

Le X o loo faaolioli nei,

Taumafai e ta i Paga lelei

Tata logo atu ai Masefau,

Ma valuvalusia ai a’ao le laau,

Punou ma tatalo i Lou Alii

Na te faasino  i lau X

Taga’i lelei i sui tauva,

Alofa, faamaoni ma le faalogologo tiga,

Lau X i ma’umau,

E le $20 lona tau.

Lau X i valetu’ulima,

Ona ua e loia I se fasipovi masima,

Lau X i luafesasi,

I pisupo ma aano o manu fasi

Lau X i matagataga,

I le tele o tupe e monoti i lau taga

Vaai pia, uisiki ma fagu sini,

O i latou na e faasese i lau X

Lau X nei matalatala,

I pusa moa, taga araisa ma pusaapa,

Lua fagu vailaau fagavao ma le puaa peti

Tolu pusa Vailima ma le kakuni sikareti

Lau X ne’i tafea,

To’atele le au taufaavalea

Lau X i lua valavala,

Ise sui e leai se monotaga

Tu mai nofonofo i le taulaga,

Galo oe talu ai lou faatamala

Uluulu solo i fale ava i Apia

Si au X ua le taulia.

Lau X i ne’i  mamulu,

I le mau folafolaga, o tala ma le tele o upu,

Ona pei ai lea o oe ose fasifa’i,

Aua na faatau lau X  i le apa pilikaki,

Ae talosia ia le Aso Faraile ua atofa,

Ia saomauli le atunuu ma le au palota,

Ia u’u lau peni e Le Alii,

E sagatonu ai lau X.

Share This

About the author