Nanai Lupematasila Elisaia Nanai

Sui tauva mo Aleipata Itupa i Lalo, Afioga Tafua Maluelue Tafua

O le afioga ia Tafua Maluelue Tafua, o se tasi o Lupe faalele a le Itumalo o Aleipata Itupa i Lalo, e tele tausaga sa galue ai i le Malo e ala i le Matagaluega a le Palemia ma le Matagaluega o Faamasinoga, ona ia tuua ai lea o le atunuu a e sailiili atu i atunuu i fafo mo le saga faalauteleina pea o lona silafia tau le poto salalau. Ua toe taliu mai i fanua ma galue ai i le taimi nei, o se tasi o le saofaiga o le Komiti Suesue o Matagaluega a le Malo le P.S.C.
Na fesiligia e le Savali e faaali lona finagalo, i mafuaaga ua faananau ai e fia tauva i le tofi o lona itumalo, ma ia saunoa ai e faapea.
E matua tele vaega e fia faalelei i lona itumalo o vaavaai pea i ai i aso uma, o ia lava vaega o matafaioi patino i le tofi faipule o le itumalo, ona tuu fesili ai lava lea pe ua mafuai se a ona le faatinoina e saofaiga i le tele o paeaiga ua tuanai. O itu uma nei ua finagalo afai e tulai mai i le tofi o lona itumalo, o le a ave i ai le faamuamua.

1. Ia faaitiitia le fuainumera o fanau e leai ni galuega;
2. Ia silasila toto’a i Taiala ma faiga faavae ua faataooto e le Malo e a’oa’o ai fanau i A’oga.
3. Ia faataua le Soifua Maloloina;
4. E le o lava le malosi o Taligalu o i ai nei;
5. Ua tatau nei ona i ai ni Auala Galue o Lotopu’e ma Tiavea Tai, ona o i si ia afioaga sa iloga ona aafia i le Tsunami, ma ua aga’i uma i uta le tele o aiga e faamautu ai, o Tiavea Tai lava ia ua leai se i si o toe nofo mau ai, e taua tele ona faalele atu ai ma le auala o Tiavea Tai, ona o loo i ai foi nai mataaga a i si aiga mo tagata maimoa ma fafo, ma le tele lava o aiga e le o lafoa’ia o latou fanua sa mua’i atia’e ai, a ua see i uta o le tali mai i fautuaga a le Malo, ona ua le toe tumau lava fesuia’iga o le tau ma le siisii o le suasami i lenei vaitau ua tatou i ai.

O le faaaliga mulimuli a le afioga ia Tafua, maimau e, pe ana i ai se fale faapitoa e fausia i se talosaga e tuuina atu ia Ausetalia; Niu Sila; Jica poo le E.U, e faatino ai meaa’oga a fanau a’oga (Home Work) E mafai lava ona velo’aso uma i ai tama fanau a le itumalo o galulue i nisi o Matagaluega a le Malo ma Kamupani, ua mautinoa o le faafitauli sili lea ona faaletonu ai tulaga o fanau i faaiuga o tausaga, e le o lava ma agavaa latou o nafa ma le fesoasoani i a latou meaa’oga.
Ua mafai foi ona faamauina e le Savali, finagalo o nisi o lenei itumalo sa mafai ona talatalanoa atu i ai, e faaalia finagalo mo lo latou lagolago, e mafuli le toatele i le afioga ia Tafua Maluelue Tafua, a e fai mai le saunoaga a le i si Tama Matua o le itumalo lenei o Aleipata itu pa i lalo, na oo atu lava i le Savali ma faaoo atu lana saunoaga e faapea. E le tau filia lava laau Matua o le vao, e le tau faailoaina foi le Matapia ma le Manaia, ma e iloga lava Lupe o le Foaga a’o felelelelea’i solo i lea itulagi ma lea itulagi. Ia talosia ia le alofaiva o le itumalo mo le sailia o se sui agavaa e seei i le Palemene aua se manuia o Samoa mo le lumanai.

Ia Manuia tele le Palota.

Share This

About the author

Reporter 2