Tusia Fuialo Ulafala Seupule

O se tala fiafia mo Samoa ua le gata iā latou o loo auina atu le talo i Niusila ae o tagta au pito sili ona fiafia o le au fai faatoaga.

Na faaalia e se tasi o Ofisa Sina o le Matagaluega o Faatoaga le Susuga Pueata Manuleleua e faapea, o le taimi nei lava ia i Niusila ua nao le talo lava a Samoa ua i ai.

Sa faamatalaina e Pueata o le taimi nei ua faasolo atu lava i le 10 konetaina talo e auina atu i totonu o le 2 vaiaso.

O le tulaga moomia o le talo a Samoa i maketi i Niusila o le pogai lea o le saoasaoa o le auina atu o le talo.

Na faailoa foi e Pueata e faapea, o le tulaga faaletonu o le talo a Fiti mo se taimi umi o se faitotoa lelei lea mo fai faatoaga i Samoa nei.

Na faamanino e le Ofisa Sili Lagolago o le Matagaluega o Faatoaga le Afioga Misa Konelio le tulaga lea i le talo a Fiti.
Saunoa Misa, o le talo a Fiti sa auina atu i le nofoaga ua taua o Taveuni ma ua i se tulaga faaletonu lea nofoaga ona o aafiaga i le eleele o lea motu.

E umi se taimi o le a tuu ai lea eleele i Taveuni ona o se fautuaga faa faifaatoaga mo Fiti lava latou o le faaaliga lea a Misa.
Ia Samoa lava ia ua faasolo atu foi i luga le tau o le talo e pei ona fuaina mai ai e le au fai faitotoa mai faifaatoaga.

Na fa᾿aalia e Misa i le taimi nei ua oo atu i le $45.00 ma le $44.00 i le 20 kilo lea tau lea ua i ai i le taimi nei.

Na maua se avanoa e feiloai atu ai i se tasi o faifaatoaga le alii o Peni Tana mai Satalo ma ia fa᾿aalia ai le agaga fiafia i le tau o le talo lea ua i ai faatusatusa i tausaga ua alu.

O le vaiaso nei e 4 nisi o konetaina o loo faatumu i le nofoaga i Nuu ma o loo i ai le faamoemoe e auina atu i Niusila i le faaiuga o le vaiaso.

O tele o ia faalauiloa mo le auina atu o le talo i fafo aemaise o tulaga uma tau atinae o faatoaga o le a maimoa i ai le atunuu i le vaiaso o le faaaliga mo faatoaga a le Matagaluega.

Share This

About the author