Tusia Taunuuga Toatasi

Mo le faafaigofieina o femalagaiga a le Aiga Folau a Samoa e asiasi e atumotu laiti o le Pasefika, na foai atu ai e le Aai o Aganuu (Samoa Culture Centre) i Falelauniu le paopao e fesoasoani ai mo a latou femalagaiga.

O lea foai na faatautaia lava i le nofoaga o loo i ai le Aai o Aganuu i Falelauniu i le vaiaso na sei mavae atu nei.

O le Afioga ia Maulolo Leaula Tavita Amosa, o ia lea o loo Pulea le Aai o Aganuu i Falelauniu, na ia tauaaoina lea foai i le Kapeteni o le Vaa a le Aiga Folau a Samoa le tamaitai o Fealofani Braunbraun.

Na saunoa Maulolo e faapea, o le Afioga i le Peresitene o le Vaa o le Gaualofa, Afioga Leilua Ame Sene na ia talosaga i le Aai o Aganuu mo se fesoasoani e ala i le paopao.

O lea paopao e pei ona talosagaina e le tamaitai Peresitene e faafaigofie ai ona femalagaiga a le auvaa e asiasi i atumotu laiti o le Pasefika.

Na tuu le avanoa e le afioga ia Maulolo i le Peresitene e filifili ai se vaa e moomia mo faigamalaga a le auvaa.

Peitai na filifilia ai loa e le Peresitene le paopao lea na faatino ai loa le foai e pei ona molimauina e le auvaa.

Na momoli le agaga faafetai o le tamaitai Kapeteni i le Afioga ia Maulolo, ona o le manatu i le auvaa ma le latou faamoemoe e pei ona foai ai lea paopao.

E le gata i lea, a e na momoli foi le agaga faafetai mai le Sui Peresitene o le Komiti a le Aiga Folau a Samoa, le Afioga Tupai Molesi, e avea ai o ia e fai ma fofoga taumomoli o Lana Afioga i le Ao Mamalu o le Malo, o le faatam�? o le Aiga Folau a Samoa, e faaleo ai le faafetai i le Afioga ia Maulolo ma le Aai o Aganuu mo le foai ua taulimaina.

“O se foai taua tele ma le aoga mo le auvaa, ona o le a faafaigofie ai femalagaiga i le va o atumotu laiti o le Pasefika lea o le a asiasi i ai le Aiga Folau a Samoa.�?

Faafetai mo le silasila mamao ma manatu e faataua le folauga i le vasa, o le faaopoopo lea a le Afioga ia Tupai.

Na maua foi le avanoa na tuuina atu se tasi o vaega o le vaa ua taua o le “iako�? e le kapeteni o le vaa a le Aiga Folau, mo le Afioga ia Maulolo aemaise o le Aai mo Aganuu.

O lea iako e pei ona taua e faapea, o malaga a le Gaualofa e faapea ua soo le lalolagi o taamilo ai, ae o loo faaaogaina lava lea iako.

Na faaiu le faamoemoe, ina ua toe saunoa le Afioga ia Maulolo e faapea, a fai ae toe mananao le auvaa e ta se paopao tele atu nai lo le paopao lea, ona fesootai le o le Aai o Aganuu e faatino lea faamoemoe.

O le Afioga ia Talolevavau Iafeta na taina lea paopao i totonu o le lua (2) masina ma le vaiaso.

Ae mo le silafia e le mamalu o le atunuu, o loo i ai paopao o loo faatauina i totonu o le Aai o Aganuu pe a moomia e soo se tasi se paopao mo faigafaiva.

O le nofoaga a le Aai o Aganuu o loo i Falelauniu sosoo ma le Aoga a Ropati Louise Sitivenisoni (RLSS).

Share This

About the author