Tusia Mamea Ulafala Seupule

Ua toe taliu mai ma le manuia i fanua le faigamalaga a le Afioga i le Alii Palemia Tuilaepa Sailele Malielegaoi o ia foi o le Minisita mo Tagata Tafafao i Samoa.

E vaiaso atoa na toesea ai lana afioga e pei ona faatasia ai i le Malo o Toga ma Minisita uma o lenei atinae i le Pasefika.

Na faaalia e Tuilaepa e faapea, o le fono lenei o le fono faaletausaga a Minisita uma o le Pasefika o loo latou taulimaina le atinae o tagata tafafao. “E tele mataupu taua na laga i le fono lenei e faatautau lava i le saga tapue pea o lenei atinae mo atunuu uma o le Pasefika.

“E pei ona silafia o le atinae lenei o loo numera tasi lona tupe maua i le tele o atunuu o le Pasefika lea foi e i ai ma Samoa.

“O itu la na lotea i le fono lenei o auala e saga faaleleia ai pea le atinae o tagata tafafao e ala i le saili matagi i nisi o luitau i totonu lava o le Pasefika.

“O lona uiga e matuᾱ alagatatau ona lava vaalele mo le femalaga ai o tagata, o faletalimalo ia maualuga lona tulaga lelei ma ia matuᾱ siitia le auaunaga a i latou o loo faigaluega ai, i matata eseese i le auaunaga o faletalimalo.

“O lona uiga e amata mai lava i le malaevaalele ona faatino le galuega faatosina seia oo mai i le kesi pito i luma o faletalimalo e tatau ona 100% ia auaunaga uma e tuuina atu i le tagata asiasi mai.

“O pito uma nei  afai e maua e se faletalimalo, e le taumate foi le umi ona nofo ai o sea malo ao le itu sili ona taua o le a fai ia ma ave feau i le talai atu i le lalolagi, o le matautia o le matagofie o le mea na nofo ai i Samoa, e fai o le lelei o potu o le faletalimalo ao le mea sili o le auaunaga a tagata faigaluega na ofo atu mo ia ao i ai i Samoa.

“Ia sei silasila la tatou ia le matagofie o lea tala, ma tatou te fia faalogo uma lava i ituaiga tala faapea, ae o le a nei la le tatou gaioiga pe afai e foi le tagata ma le tala, se leaga le faletalimalo e mataga le teuga o ona potu, e palapala le wall, ao le itu sili ona leaga o le faaūū o ona tagata faigaluega, ia ua tatou iloa uma lava le iuga o lena faletalimalo e lē atoa se masina ae toe o i lalo faamalama.

Share This

About the author